我是米迷

 好多人話鍾意DISNEY，咁究竟係鍾意WALT DISNEY本人？抑或係佢(或者迪士尼公司)創作嘅角色(卡通或者電影)？定係DISNEY主題公園呢？

如果三個答案都係，相信你一定係一位超級fans。

 

華特迪士尼先生當年憑一隻老鼠令佢實現咗自己嘅夢想；亦令到其他鍾意夢想嘅人搵到目標，而我就係其中一份子 。Yes，I’m the one of them！

咁我哋今次傾D咩？

既然係 [We Talk Disney]；不如就先講講點解我哋成為粉絲好唔好?

我諗係童年情意結，當年家母想我學好英文；所以細細個就帶我睇西片同卡通，而第一次有印象睇嘅卡通就係62年嘅  [寶貝歷險記]#1。之後就開始咗迷上咗迪士尼~ 當年只係可以响戲院一年睇一套戲同埋响報紙檔買二手迪士尼漫畫#2。

（註1: 迪士尼第十七部經典動畫 [寶貝歷險記] 101 Dalmatians於1962年5月2日在香港上映，上圖為當年發行之海報。）

（註2: 漫畫為中英文版本，主要為米奇老鼠同唐老鴨故事，當年收藏因為火災已經不存。）

我其實鍾意嘅角色好多，不過自細鍾意藍色，所以覺得唐老鴨件水手裝好吸引，後來開始睇迪士尼漫畫之後；雖然見佢做人無咩目標又幾鬼懶，不過就係夠真性情；唔會好似米奇咁毫無缺點瑕疵，呢種比較接近一般常人嘅性格，會令人有代入感同埋認同，至於佢對黛絲嘅一往情深就更同我係巨蟹座嘅性格一模一樣。

係呢~我哋好似仲未講到個標題喎…..

你唔講起；差D唔記得添，話說1990年8月20日；日本講談社發行第一期 [DISNEY FAN]，之後日本就開始出現咗”Disney Fan, Me too”呢句嘢。

                                                    ( Disney Fan #1 / 1990 )

時至今日，[DISNEY FAN]  出版超過270期；由最初季刊轉至現時月刊（另每年有3至4期增刊），個人認為[DISNEY FAN]  不但影響日本迪士尼迷，更成為香港Disney fans共同至愛，標題採用”我是米迷”就是I am a Disney Fan的意思。

點解係"米迷"而唔用"迪迷"呢？

其實按理應該好似你話齋用”迪迷”(迪士尼迷)，不過覺得"米迷"好似比較順口，(當中米字當然係代表米奇老鼠嘅意思)，因為華特話過一切由一隻老鼠開始。

原來係咁……不過國內好似都有相類稱呼，我哋好唔好中西合壁用"D迷”呢？

呢個都幾盞，好切合香港人又中又英嘅特色，你認為點樣先算係"米迷"呢？

首先我覺得"米迷"一定有自己鍾意嘅角色；好似我喜歡米奇咁，又會收藏一啲產品；响網上同報紙雜誌留意樂園、電影或者有關迪士尼嘅新消息；當然會經常入Park；因為可以玩機動遊戲、欣賞表演、巡遊、煙花；又可以同啲志同道合嘅朋友傾吓偈交流吓心得.....

講得無錯。不過因為以前資訊唔發達，本地其實粉絲唔多，而且又唔會有D23或者Disneyana呢類fans組織。

以前未有Internet嘅時候，究竟係點？

香港以前未有迪士尼樂園果陣 (或者早年嘅Disney Store#) ，我就只可以一年去外地(日本或者美國Disneyland)朝聖幾日，能夠買到嘅嘢唔似家陣咁多，响香港就算行云哂D百貨公司，都未必搵到嘢買，完全唔似而家咁方便~ 可以任何時候响eBay、Amazon 、Google、Yahoo、淘寶等等平台搵到寶藏....

（註: 香港迪士尼專門店Disney Store於1994年12月10日於沙田開設第一所分店，並陸續開設多間分店於各區，至2005年6月16日，機場兩處營業店舖正式更名為Hong Kong Disneyland。）

我哋而家真係幸福好多，咁以前究竟會儲D咩？

多數係紙品類；好似郵票、貼紙、明信片、書籍、仲有玩具、日用品、錶、影音產品。後期先開始有儲襟章、電話咭、公仔、徽章等等。

種類都幾多喎…

咁你個人又認為DISNEY呢幾個字母代表咩嘢？

按照我自己嘅解讀；DISNEY就係夢想(DREAM)、影像(IMAGE)、歌曲(SONG)嘅化身；而從佢嘅作品同埋一手創建嘅樂園可以讓人感受到美好(NICE)；享受(ENJOY)同埋青春(YOUTH)呢幾種特質，你覺得點？

我相當認同你嘅解讀！尤其喺當中夢想(DREAM)；影像(IMAGE)同埋歌曲(SONG)。

作為一個迪士尼迷，最好當然係可以去哂全部迪士尼度假區，睇哂全部卡通同電影，至於收藏方面就梗係儲得幾多得幾多，不過香港地未必有咁多地方可以擺咁多"阿媽 "(或老公或老婆) 話無用嘅嘢……++  

                       ( 圖片來自Disney Fan #1, 陳列實物擺放於LA Disneyland Hotel走廊 )

嘩!!!果然好壯觀噃~ 迪士尼產品真係多如銀河沙數，如果唔係官方嘅話，試問有邊個可以儲得齊吖？

所以咪專登整個BLOG出嚟，希望拋磚引玉吸引更多"米迷"加入我哋呢個大家庭，到時就可以...

咁又係喎，本地真係無咩平台提供比我哋呢啲"米迷 "將自己啲珍藏同人分享，呢個構思我Buy喎。

好喇，今日講住咁多，下次我哋再傾過~ 記得睇埋每日嘅"私のDC"同"你又知唔知"!!!