點"紙"咁簡單?

今日係大年初一，恭喜各位事事馬到功成，健康快樂!

上次我哋講咗點樣做咗米迷，不如今日就講吓儲D咩嘢好唔好？

呢個話題唔錯，話哂作為一個米迷；點都會有D珍藏嘅，雖然年資淺，不過小弟都儲咗唔少架。

通常响香港個PARK（指迪士尼主題樂園）見到D粉絲；如果問佢哋儲D咩嘢，答案多數係話儲貼紙、指南同埋徽章，我諗你應該都係佢哋一份子？

pins from theme park

無錯。雖然冇話好專注去儲邊一類嘢，不過樂園嘅紙品容易收集，所以儲埋唔少。至於PIN（徽章）其實都有儲；可惜近幾年款式唔太討好，依家只係選擇性收集。

我覺得迪士尼呢個世界有好多唔同類型嘅產品，如果鍾意迪士尼唔係一定要儲PIN。樂園初期交換徽章呢個模式；目的其實係想加強CAST MEMBER（演藝人員）同賓客之間嘅溝通，另外希望透過交談讓更多人認識一D迪士尼角色同埋文化，於是令好多鍾意迪士尼嘅朋友開始收藏徽章，但係我就唔係咁大興趣。

點解你認為徽章唔好儲？

我覺得本地天氣唔適合儲呢類金屬產品；而且生產款式太多，推出嘅時候又無資料，搜集比較困難。

咁你有咩提議？

提議唔敢講，之不過我認為可以選擇其他產品，譬如紙品類就有好多CHOICE。

你講得啱，宣傳紙品係最吸引我收集嘅項目。

呢樣嘢雖然未必要錢買；不過就好需要時間四圍搵，而且好多可能係非賣品。

我喜歡挑戰難度嘛，咁你呢？你又有冇特定收藏？

我比較花心；幾乎所有迪士尼動畫角色、電影、樂園嘅各類產品都會收藏；不過主要都係儲紙製品；有D用錢買，有D免費攞，有D有錢都買唔到(即係非賣品或者紀念品)。
好似郵票、書籍、電話咭、利是封、收藏咭、月曆、CARD GAME（紙牌遊戲）、仲有最大路嘅STICKER（貼紙）、樂園指南同POSTCARD（明信片），就算包裝紙、目錄、入場劵、戲票同銀紙呢D更冷門嘅都儲。

銀紙都有？

無錯。你唔知有DISNEY DOLLAR咩？

Disney Dollar - 2005 series

（註：迪士尼鈔票；1987年5月5 日開始於美國迪士尼樂園發行，至今款式約數十。）

响咁多唔同嘅種類；以你為例，有咩類別比較吸引去收藏呢？

而家比較專注响郵票、書籍、CARD GAME、月曆同利是封；當中最特別係利是封。

有咩咁特別？

因為全球只有中國日本幾個東亞國家有呢個傳統，歐美地區根本唔曉得呢D係咩嘢 ；另外因為每年只會响新年之前發買，又唔需要好多時間去搜集，另外生產款式唔會好多………不過剩係今年已經有過百款。

 

red packet

咁而家儲咗幾多款？

由1994年開始，儲咗接近二十年，已經接近三千款。

咁你又點解揀呢幾類紙品去儲？

首先講我最主力嘅郵票，呢個項目係世界各地都好普及，而且迪士尼郵票已經有幾十年歷史。就算而家起步嘅話，一般郵票仲可以追得番，只有一D比較發行量特別少嘅郵品搵唔番。

 

postage stamp pack set

（註：全球首枚迪士尼郵票；於1968年9月11日由美國郵政發行，至今曾經推出的地區超過一一百個，系列郵品超過一萬款構圖。）

郵票究竟有咩吸引你？

首先郵票本身有郵資，唔似徽章咁樣無認可價值，設計精美之外又有地方特色，所以一直以來，我以佢做重點搜集。

咁而家咪儲咗唔少？

已經超過一百個唔同地區，夠膽講係"迪士尼郵票達人"。如果有興趣可以去”MY DISNEY STAMP”呢個網誌睇吓在下嘅收藏。

除咗郵票仲有咩好介紹？

紙品類比較吸引我嘅會係月曆，因為佢似一張加強版嘅POSTCARD，又似一款濃縮版嘅POSTER，正所謂買一得三，而且每年只出一次，就算儲都唔會洗好多錢。

Theme park calendar

除此之外，最重要應該係CATALOG(目錄)，大家都知道迪士尼產品多不勝數，有錢買都未必買得哂，買到又未必有咁多地方擺，但係如果無咩錢，最好就係儲CATALOG，起碼知道曾經有呢樣嘢，又可以叫做擁有咗...(張相片)。

聽落都有D道理，我都喜歡儲樂園產品目錄，咁通常有咩CATALOG可以買得到？

而家有幾間出版社會定期推出呢類書刊，最為本地米迷熟識嘅有TOKYO DISNEY RESORT COLLECTION，另外美國有DISNEYANA PIN GUIDE等等，有機會就介紹比大家。

Theme park catalog book from Japan

咁仲有咩紙品類好儲？

另外COLLECT CARD(收藏咭)都幾好，因為通常除咗正面係相片或者卡通之外，背面會有一D資料，可以比收藏者知道多D關於迪士尼知識，而家只有美國同日本幾處有發行，唔算貴重嘢。

collect cards 

至於PLAYING CARDS (紙牌遊戲)亦可以係個好收藏，因為一來體積唔算大，通常都會有特別嘅角色設計，構圖精美，而且又有週年紀念或者節日版，所以係一種唔錯嘅選擇。除咗最普遍嘅POKER之外，另外紙牌遊戲仲有熱門嘅 UNO、MEMORY、GO FISH、DOMINOES、CRAZY 8等等選擇。

playing cards from theme park

睇嚟紙品呢範真係好犀利喎，我都要DIC起心肝諗諗佢!!

臨到尾聲，我哋都唔講咁多，為免阻住大家去拜年，剩係用幾張圖片等你諗吓自己嘅收集方向，下次再傾。

祝各位响馬年搵到更多心頭好!! BYE-BYE~

theme park time guide & map

theme park packing paper

theme park ticket

theme park leaflet 

theme park sticker