身為米迷，最鍾意問剛認識嘅朋友”你喜歡什麼？”假如答案係”迪士尼”嘅話， 一定會非常興奮。
不過他們喜歡迪士尼，大部份指嘅係迪士尼嘅卡通或者電影製作；（諸如魔盜王系列同彼思動畫） 又或迪士尼嘅卡通人物；（好似米奇老鼠同唐老鴨）又或迪士尼嘅商品；（徽章而至擺設收藏）或者係迪士尼嘅主題公園，幾乎沒有人提及華特本人。
想來是佢哋大部份係八十後九十後嘅緣故，本人有幸曾於七十年代曾經觀賞過華特本人嘅電視節目《彩色世界》The Wonderful World of Disney（無線電視購入節目），如今要睇華特主持節目，唯有買DVD重溫。
註 : 節目於美國1954年10月27日在ABC首播；為黃金時段第二長壽電視節目，期間更換多個不同名稱，至1983年暫停，其後陸續以其他名稱推出至今，華特為節目主持人直至1966年逝世。
除咗迪士尼電視節目DVD之外，最廣泛嘅商品仲有郵票；電話咭；塑像等等......
一直各地都有推出好多傳奇人物嘅故事電影，好似林肯；甘地；瑪麗蓮夢露；貓王等等；不過就從來未有迪士尼，還幸2013年我們終於等到了。
2013年迪士尼壓軸出場的電影係《大夢想家》(Saving Mr. Banks)（美國於2013年12月13日全面公映），故事骨幹以華特迪士尼如何從女作家 Pamela Lyndon Travers (卓華斯)（1899-1996）手中取得《歡樂滿人間》(Mary Poppins)（原著於1934年發行）電影版權為主。
我唔係影評人，不過想用米迷嘅身份講吓對呢部戲嘅感覺~
圖片引用：華特迪士尼公司
例如利用直呼名字嘅迪士尼文化；令人明白佢同員工之間關係如何因此而更加密切，亦反映咗堅持所謂什麼先生小姐嘅固有禮儀已經不合時宜。
及後一句稱得上迪士尼先生 "Mr. Disney" 只有佢父親；就讓我們明白迪士尼對父親的尊敬程度，正如我哋米迷對呢個品牌相同的重視程度。
為咗自己要履行對個女嘅承諾；用咗20年時間向卓華斯不停求懇，呢一種鍥而不捨嘅精神就非常值得我哋去學習。
其中又有一個鏡頭講佢為咗唔想比人見到佢食煙呢個所謂壞習慣；會要求秘書為佢擋駕，證明佢唔想做一個唔好嘅榜樣。
記唔記得佢向卓華斯講 "唔係有好多人可以同華特迪士尼去迪士尼樂園" 呢一句？簡直令我哋呢D米迷又嫉妒又羨慕。
圖片引用：華特迪士尼公司
當鏡頭轉到去樂園嘅時候；一班忠實米迷走上前要攞簽名之際，見佢從口袋攞D預備好嘅簽名比米迷，大家有無聯想到今日樂園點解向來賓派貼紙呢？
見佢三言兩語就令卓華斯騎上木馬；之後仲笑笑口話多謝卓華斯令佢贏咗同同事嘅打賭，不但感覺到佢嘅幽默感；而且仲明白佢凡事一早就運籌帷幄。
另外電影敢於借卓華斯一張嘴；謾罵迪士尼製作如何欺騙小孩更是一絕，呢種似眨實褒嘅反調口吻更加讓一眾米迷死心塌地。
面對卓華斯無理要求；好似話要電影裡面全部唔准用紅色就係最佳例子，大家都知道故事背景係响倫敦；郵筒、巴士、國旗呢啲大英帝國象徵點可以變做第二樣色？見到華特最後無奈答應呢個要求，就比我哋曉得成大事；需要嘅係忍辱負重，而唔係一定要據理力爭。當然，電影最後並未需要做出呢樣舉動。
最後因為卓華斯認為華特呃佢，於是走番去老家，而華特簽署開支時發現咗卓華斯嘅原來姓氏，馬上恍然大悟，之後又拋下工作；遠赴倫敦求見卓華斯，除咗令人明白佢懂得咩嘢叫禮賢下士之外，亦不能不佩服佢諗到點樣解開卓華斯嘅心結。
至於聽佢細述童年往事；就懂得如果凡事向好處想，你就會得到更大滿足。試問如果閣下細細個就要冒風雪出去派報紙；仲要凍到暈倒街頭，你仲會唔會好似佢咁體諒父親？會唔會以此鼓勵自己更加上進？
言談之間又充分表達佢對版權嘅尊重同對作者嘅重要性，大家都知迪士尼曾經失去奧斯華嘅擁有權，所以對版權呢樣嘢極之看重。
影片沒有特別以華特做焦點；反而把故事側重於幕後功臣嘅描繪，同時向佢哋作出最高致敬，因為能夠把固執的卓華斯回心轉意最重要部份是音樂。
影片描寫相關音樂創作部份有不少場面；重新把Chim Chim Cher-ee、A spoonful of sugar、 Let’s go Fly a kite、Supercalifragilisticexpialidocious嘅原創意念演譯，充分凸顯音樂在迪士尼文化之中扮演極其重要的功能呈現眼前，同時又肯定 Sherman Brothers (謝爾曼兄弟) 兩人在音樂上的成就。
圖片來自網上資料
註：Robert Bernard Sherman (1925-2012) / Richard Morton Sherman (1928- )兄弟二人作品獲獎無數；現時在香港迪士尼樂園播放的小小世界；小熊維尼就係佢哋嘅作品，兄弟二人同時於1990年獲頒迪士尼傳奇獎項Disney Legends award表揚。
影片令人覺得有困惑嘅地方就係卓華斯進入酒店房間果陣，房間擺滿好多迪士尼公仔，其中有米奇、唐老鴨、鋼牙、大鼻同埋小熊維尼（另外其他睇唔切），卓華斯仲話覺得迪士尼把艾倫亞歷山大米恩Alan Alexander Milne（1882-1956）隻小熊攪到唔同曬果樣好唔妥。
圖片來自網上資料
原本係想借此表達卓華斯唔認同迪士尼一貫嘅經營路線；又認為迪士尼嘅作品成日令人活在童話裡頭，係令到兒童對現實世界無戒心咁話，所以一直唔想把Mary Poppins嘅版權賣比迪士尼。
不過作為米迷，我就曉得米恩遺孀响1961年先至出售版權比迪士尼；照道理當時卓華斯唔應該見到一隻已經改頭換面嘅熊仔，就會知道果隻係出自米恩手筆嘅小熊維尼Winnie the Pooh。
何況迪士尼第一部發布小熊維尼嘅作品係响1966年2月4日，在下認為卓華斯當時未必可能見過由迪士尼生產嘅商品。無記錯嘅話；電影場景當時仲係1961年，唔通迪士尼已經大量生產小熊維尼嘅商品同埋廣泛宣傳？
圖片來自網上資料
但係我就唔相信迪士尼會响咁短時間就草草決定新版嘅小熊維尼，如果唔係，一向鄙視迪士尼嘅卓華斯點會知道有呢隻迪士尼版本嘅小熊維尼？難道迪士尼已經知會咗佢？唔知你又覺唔覺得呢度有啲穿崩呢？
最後要講嘅係好多謝呢套戲所有出過力嘅台前幕後一切工作人員，因為佢哋嘅努力，所以我哋先至可以欣賞到一部咁與別不同嘅好電影。
當然仲有我至喜愛的湯漢斯Tom Hanks近乎完美演繹了華特迪士尼先生。
沒有留言:
張貼留言